අරගලය…උද්ඝෝෂණය… නිවරදි දිශ…

, , Leave a comment

අරගලය…උද්ඝෝෂණය…
නිවරදි දිශානතියක් කරා මෙහෙයවීමක් නොවන්නේ නම්;
එය තවත් දියවී…වියැකී…යන තැනකට තල්ලු වේවි…

පාර්ලිමේන්තුව විසුරුවා හැර ජනාධිපතිවරයා ඉල්ලා අස්වුවහොත්, ඊලඟට ඇත්තේ ආණ්ඩු ක්‍රම ව්‍යවස්ථාවේ 4 වන ව්‍යවස්ථාව ප්‍රකාර ජනතා ස්වාධිපත්‍යය සොයා ආණ්ඩු ක්‍රම ව්‍යවස්ථාවේ 30(2) ව්‍යවස්ථාවේ සඳහන් වරණයට ඇති අයිතිවාසිකම ක්‍රියාත්මක කර නව ජනාධිපතිවරයකු හෝ ජනාධිපතිවරියක තෝරා ගැනීමයි.
පාර්ලිමේන්තුව සඳහා ද ආණ්ඩු ක්‍රම ව්‍යවස්ථාවේ 62 වන ව්‍යවස්ථාව ප්‍රකාර 225 දෙනකු තෝරාගැනීමට මැතිවරණයක් පැවැත්වීමයි.
රටේ දැනට තිබෙන තත්වය අනුව මැතිවරණ දෙකක් සඳහා රුපියල් කෝටි දෙතුන් දාහක් වියදම් කිරීම, කබලෙන් ලිපට වැටීමකට හේතුවක් වෙන්නත් බැරි නැත.
අනෙක් පසින් දැනට පවතින තත්වය මත ප්‍රධාන බලවේග තුනෙන් එක් අයකුටවත් සියයට පනහ ඉක්මවූ ඡන්ද ප්‍රමාණයක් ලබා ගැනීමට ඉඩක් නොමැති බවත්,මහ මැතිවරණයකින් බහුතර බලය ඇති ආණ්ඩුවක් පිහිටුවන්නට නොහැකි බව, මාගේ කියවීමයි.
ඒ වගේම මේ මොහොතේ ලංකාව මැතිවරණ ක්‍රියාවලියකට එළඹුන හොත්, ප්‍රාදේශීයව, ගම් මට්ටමෙන් බොහෝ ගැටලු සහ ගැටුම් ඇතිවීමත්, ඉන් එහාට ගිය ලේ වැගිරීම දක්වා උත්සන්න වන තත්වයන් නිර්මාණය වීමටත් පාර කැපෙන බව ලංකා ඉතිහාසයේ උගත් පාඩම් ප්‍රකාර මාගේ කියවීමයි.
පාර්ලිමේන්තුව තුල හඬ නගන ජනතා නියෝජිතයන් කිසිවකු තමා පත්කර යැවූ ජනතාව වෙනුවෙන් ගිලෙන්නට යන නැව හබල් ගෑමට හෝ ලඟම තිබෙන තොටුපළ වෙත රැගෙන යන්නට පෙරට එන බවක් නොපෙනේ.
කපිතාන්ට බහින්නට කියා කියූ මුත්; සුක්කානම භාර දෙන්නේ කාටදැයි සැලසුමක් හෝ නොමැතිව, කැමැත්තෙන්ම සුක්කානම භාර ගන්නට කෙනෙකු නොමැති කල,
කපිතාන් සුක්කනම අතහැර බැස ගියොත්, නැවේ ඉන්න කටින් නැව් පදවන කප්පිත්තෝ, නැව වෙනත් මාර්ගයකයක් ඔස්සේ ඔවුන්ට අවැසි තොටුපොළ වෙත පදවා ගෙන යන්න බලන් ඉන්න කප්පිත්තෝ සහ නැව මොකක්ද? තොටුපොළ කොහේදැයි නොදත් කපිතාන්ලා සුක්කානමට පොර කන විට නැව මුහුදුබත් වී යාවි.
Life jacket දා ගන්න පුලුවන් උදවියත්, ඩින්කි බෝට්ටු ටිකට ගොඩවන උදවියත්, පීනන්නට හැකි පිරිසත් අලුත් ගොඩබිම් සොයා යාවි. මුහුදු බත් නැවේ පාවෙන ලෑලි කෑලි අල්ලාගත් අහිංසකයෝ, ඒ මේ අත පාවෙමින් සිටීවි.

එහෙනම්, මොනාද? කලයුත්තේ…

ජන පීඩනය අරගලයක ස්වරූපයෙන් නියෝජිත ප්‍රජාතන්ත්‍රවාදය හරහා තමුන්ම තෝරාගත් නියෝජිතයන්ට එරෙහි වෙමින් ඔවුන් වටලෑම දක්වා උත්සන්න වූ මොහොතක, මේ ජනතා පරමාධිපත්‍යය බිම් මට්ටමෙන් නැගීගත් තැනම ලොප් වන්නට ඉඩ නොදිය යුතු යැයි මට හැඟේ.
එකී ජන බලවේගය එක් එක් පුද්ගල අවශ්‍යතාවයන් සහ දේශපාලනික අවශ්‍යතා සඳහා ගණිකා සේවනයේ යෙදවෙන තැනට පත් නොකල යුතුමය.
එසේනම්,
අරගලකරුවන් වෙනුවෙන් නොමිලේ පෙනී සිටීම මාර ලොකු දෙයකැයි සිතා මේ දවස්වල අපිට කතා කරන්න යැයි කියන නීතිඥ ප්‍රජාව,
රටට ගැලපෙන නව ආණ්ඩු ක්‍රම ව්‍යවස්ථාවක් කෙටුම්පත් කර ජනතා අධිකරණය ඉදිරියට ගෙනවිත්, එහි සම්මත කර ගැනීම දක්වා සිය බලපෑම් කණ්ඩායම මෙහෙයවිය යුතුය.
ආර්ථික, දේශපාලන, රාජ්‍ය තාන්ත්‍රික, ව්‍යවසායක, කම්කරු,අධ්‍යාපනික සහ අනෙකුත් සියල් ක්ෂේත්‍ර නියෝජනය කරන ප්‍රාමාණික උගතුන් රට නිසි මඟට ගෙන එන්නට අවැසි ප්‍රතිපත්ති රාමුව සකසන්නට එකතු විය යුතුමය.ඒ හරහා රට දේශපාලනිකව භාර ගන්නේ කවුරු උනත්, ඔවුන් සමාජවාදී, ලිබරල්ද, නව ලිබරල්ද, පශ්චාත් නූතනවාදීන්ද යන්න මත නොවෙනස් වන
* අධ්‍යාපන ප්‍රතිපත්ති
* විදේශ ප්‍රතිපත්ති
* දේශපාලන ප්‍රතිපත්ති
* කම්කරු ප්‍රතිපත්ති
* ආර්ථික ප්‍රතිපත්ති
* විගණන ප්‍රතිපත්ති සහ ආනුශංගික උපායමාර්ගික ප්‍රතිපත්ති සම්පාදනය වෙනුවෙන් එළඹිය යුතුය.

මෙලෙස ජනතාව වෙතින්ම සම්පාදනය වන ආණ්ඩු ක්‍රම ව්‍යවස්ථාව සහ ප්‍රතිපත්ති සියල්ල ජනතාව විසින්ම වසර පහකට ජනවරම දී පත්කර ගත් මේ නියෝජිතයන් හරහාම පාර්ලිමේන්තුව තුල සම්මත කර ගැනීමට ජනතාව මෙම අරගලාත්මක බලපෑම රැගෙනයාම මේ මොහොතේ සිදුකල යුතු හොඳම දේ යැයි මට සිතේ.
ජනතා අරගලය තම නියෝජිතයන් බිත්තියට හේත්තුකර හෝ රට ඉදිරියට ගෙනයන්න අවැසි ප්‍රතිපත්ති සහ නෛතික කාරණා ටික මොවුන් ලවාම සම්මත කර ගැනීම දක්වා මේ නැගිටීම රැගෙන යා යුතුය.
නියෝජිත ප්‍රජාතන්ත්‍රවාදී ක්‍රමය හරහා පත්කර ගත් උන් පත් කල උන් ගැන නොසිතන්නේ නම්, පත් කල උන්, පත් කරගත් උන් ගෙන් වැඩ ගැනීම දක්වා අරගලය බල සම්පන්න විය යුතුය.
නීතියේ ආධිපත්‍යය ස්ථාපිත වූ පසු,
නැවෙන් බැස යන නියෝජිතයන් පාලන බලයේ සිටියදී කලකම් වලට පල ද, නැව් ගාස්තුවද, අය කර ගැනීම පහසු වනු ඇත.
පසුව පාලනය උදෙසා නැවට නගින උන් නැවේ ක්‍රමයට අනුගත වනු ඇත.
අධ්‍යාපන ප්‍රතිපත්ති නිසි පරිදි ක්‍රියාත්මක වන කල්හි ජනතා ස්වාධිපත්‍යය නිසි වරණය උදෙසා භාවිතා වී, සුදුස්සන් නැවේ සුක්කානමටත්, එන්ජින් කාමරයටත්, තොටුපළ පෙන්වන්නටත් තොරා පත්වේවි.

සංවාදයට සහ විවේචනයට විවරය.

#අරගලයනිසිමගට

Click here to see full post on FB

#MirigamaApi #මීරිගමඅපි #Mirigama #මීරිගම