මේ දිනවල ප්‍රධාන මාතෘකාව බවට ප…

, , Leave a comment

මේ දිනවල ප්‍රධාන මාතෘකාව බවට පත්ව ඇති “ICE” නැතිනම් Crystal Methamphetamine ගැන යමක් ලිවිය යුතුමැයි සිතුනා.
ඒ එහි අගුණ ගැනවත්, විනාශය ගැනවත්, භාවිතාව ගැනවත් නෙවේ…
රට ඇතුලේ මෙච්චර බහුල වීම සහ Street Drug එකක් ලෙස ප්‍රචලිත වීම පිළිබඳව…
අපේ රටේ මත් ද්‍රව්‍ය පිළිබඳ නීතිය විස්තර වන්නේ විෂ,අබිං සහ අන්තරායකර ඖෂධ පනත තුල.
එකී පනතට මෑතකදී ගෙන එන ලද සංශෝධනය ප්‍රකාර එතෙක් විෂ මත්ද්‍රව්‍ය යටතේ සැලකූ හෙරොයින් හෙවත් Dysatalyl Morfeen, ගංජා හෙවත් Canabis Sataiva L, වැනි දේ අතරට ICE (COOL, සීතල) හෙවත් Crystal Methamphetamine එකතු උනා.
එකී නව සංශෝධනය අනුව ICE ග්‍රෑම් 10 කට වඩා සන්තකයේ තබා ගැනීම සහ/ හෝ ජාවාරම් කිරීම මරණීය දණ්ඩනය ලබා දිය හැකි වරදක් බවට පත්ව තිබෙනවා.
ඒ ගැන දීර්ඝ ලිපියක් පනත සංශෝධනය වූ දිනවල මේ පිටුවේ සටහන් තැබුවා.එහි Link එක මේ ලිපිය අවසානයේ නැවත අලවා තබන්නම්.

මේ පනතේ සංශෝධනය සම්මත වූ පසුව ICE ගැන සමාජ කතිකාව පුළුල් වූ බව දැකගත හැකියි.
ඒ සඳහා මාධ්‍ය කරන උළුප්පාලීම සමහර තැනක දී…හිරිකිතයි…ඒ වගේම අතාත්විකයි.
ඒ කෙසේ නමුත්, ICE රට තුල බහුල වීම එක වර සිදුවූවක් නෙවේ.මීට වසර හතරකට පහකට කලින් ICE ගැන ලාංකීය තාරුණ්‍යය දැන සිටියේ නෑ. එක් You Tube වැඩසටනකින් ඇතිකල කුතුහලය පසු කාලීනව රටේ තාරුණ්‍යය මේ මත්ද්‍රව්‍ය අත්හදා බලන්න පෙළඹූ බවයි මාගේ හැඟීම.
ඉනික්බිති, ගෙවී ගිය වසර තුනකට කිට්ටු කොරෝනා කාලය තුල ICE ක්ෂණිකව Street Drug එකක් බවට පත් වුනා. ඒ කොතරම් දැයි කියතොත්, ගම් දනව් වල රු.500/- ට රු.1000/- ට ICE පැකට් විකිණෙන්න ගත්තා.
ඒ සමඟම ගම්වල දිගුකාලීනව ගංජා, කුඩු විකුණපු මුදලාලිලා ICE විකුණන්න පටන් ගත්තා. ගම් වල ගංජා කෑල්ලක් බේතකට හොයාගන්න බැරි තරමට හිඟ උනා. ගංජා කෑල්ලට වඩා ලාභෙටත්, ලේසියෙනුත් ICE කෑල්ලක් හොයාගන්න පුළුවන් තැනට වැඩේ එලුනා.
ඒ වැඩේ නම් උනේ අනිවාර්යයෙන්ම Master Plan එකකට අනුව.
මන්ද යත්, කුඩු නොගහ, Joint (ගංජා) එකක් ගහගෙන උන්නු, කුඩු වලට භය, විරුද්ධ සහ ප්‍රතික්ෂේප කරලා බටේ කටේ නොතැබූ තරුණයා ICE ගහන්න බටේ කටේ තිබ්බා.
ඒ වැඩේ එලලා ICE නැතිනම් සීතල Promote කරන්න රටේ පාලනයට සම්බන්ධ ඒ වගේම පාලකයා පවා Control කරන බලවත් ව්‍යාපාරික සහ මාෆියා හස්ත ක්‍රියාත්මක වූ බවයි, මාගේ කියවීම.
රටේ නීතිය ක්‍රියාත්මක කරන පොලිසිය එකී බලපෑමට නතුවූ බවයි, මා සිතන්නේ.
ඒ සඳහා ICE මහ මොළ පොලිසිය තුලටම ICE යවලා බොහෝ පොලිස් නිලදරුවන්ට ගැස්සුවා. ඒ වගේම තමයි, ICE අල්ලනවා වෙනුවට ගංජා පමණක් අල්ලන තැනට වැඩේ හැදුවා.
අනෙක් කාරණය තමා ICE ගැන මුල් කාලීනව පොලිසිය සහ මත්ද්‍රව්‍ය සබැඳිව නීතිය ක්‍රියාත්මක කරන ආයතන සහ නිලධාරීන් සතුව පැවති අල්පමාත්‍ර දැනුම.ඔවුන්ගේ දැනුම දැන් තමයි වර්ධනය වී ඇත්තේ.
ICE කියන්නේ ගංජා වගේ ශාක කොටස් නෙවේ.ගංජා නම් කොහේ හරි වගා කරන්න ඕන.නැතිනම් වගා කරන ඉසව්වකින් ගෙන එන්න ඕන.
හෙරොයින් කියන්නෙත් එහෙම මත්ද්‍රව්‍යයක්. එයත් ලංකාව් කිසිම ලෙසකින් හදන්න පුළුවන් දෙයක් නොවෙයි. වෙනත් රටකින් ගෙන්වා මෙරටදී වෙන මොනවහරි කලවම් කිරීම පමණක් සිදුවන දෙයක්.
නමුත් අපේ මාතෘකාව ICE කියන්නේ තනිකරම Synthetic Drug එකක්.එය යම් අමුද්‍රව්‍ය ලෙස ගන්නා රසායනික ද්‍රව්‍ය කීපයක් රසායනාගාරයක් තුල සංයෝජනය කිරීමෙන් පසු ලබා ගන්නා ප්‍රතිඵලයක්.
අපේ රටට මුල් අවදියේ ICE පිටරටින් ආවත්, මෑතකාලීනව රට ඇතුලේ නිෂ්පාදනය පටන් ගත් බවයි,ලියුම්කරු සතුව පවත්නා සාක්ෂි තහවුරු කරන්නේ.
ICE නිපදවීම සම්බන්ධයෙන් ඕනෑතරම් Tutorials අන්තර් ජාලය හරහා බලන්න පුළුවන්.
විද්‍යාගාරයක් තුල රසායනික සංයෝජනයක් කරන්න සාමාන්‍ය මට්ට්මක දැනුමක් සහිත කෙනෙකුට උවමානවක් ඇති උනොතින්, මේ කටයුත්ත කරන්න පුළුවන්.
ඒ සඳහා තාක්ෂණයෙන් දියුණු රසායනාගාරයක් හෝ විද්‍යාගාරයක් අවශ්‍ය නෑ. අන්තර් ජාල කියවීම් අනුව ICE හදන්න අවශ්‍ය රසායන ද්‍රව්‍ය තුනක් හතරක් පමණයි.
අන්තර් ජාලය බලලා Snyper තුවක්කු හදන්න තරම් වැඩ්ඩෝ ඉන්න අපේ රටේ ICE හදනවා කියන්නේ සුළු දෙයක්.
ලියුම්කරු සතු සාක්ෂි අනුව අපේ රටේ රජයේ සහ පුද්ගලික රෝහල් කිහිපයක මේ රසායනික ප්‍රතික්‍රියාව සාර්ථකව අත්හදා බලා තිබෙනවා.
රට තුල නිපදවූ ICE මෑතකාලීනව බහුලව රට පුරා ව්‍යාප්ත වී තිබෙනවා.විදේශයන් ගෙන් එන ICE වලට වඩා වෙනස් ස්වරූපයේ ICE ප්‍රභේද රට ඇතුලේ තැන් තැන් වල විකිණීම ජයටම පසුගිය කාලේ සිදුව තිබෙනවා.
ඒවායෙන් සමහරක් ICE නොඑසේනම් Crystal Methamphetamine වල තිබිය යුතු නියමිත ප්‍රමිතියෙන් තොර ඒවා වූ බවත්,
ICE ධූමය ශරීරගත කර ගැනීමෙන් ICE ලෝලීන් බලාපොරොත්තු වන උත්තේජනයන් සහ වින්දනයන් කිසිවක් ලබා දීමක් නොවූ බවත්,
ICE භාවිතයේ අත්දැකීම් බහුල මත් ලෝලීන් අතර නිරන්තර කතා බහට ලක්වන මාතෘකාවක්.
ලංකාවට ICE පිටරටින් බහුලව එන්නේ බෝට්ටු මගින්,ඒ උඩප්පුබ, කල්පිටිය සහ මන්නාරම් මුහුදෙන්, ඒ හැරුණු කොට දකුණේ සහ නැගෙනහිර මුහුදෙන් ICE රටට ආ බවට පවත්නා තොරතුරු අල්පයි.
ඒ කෙසේ වී නමුත්, ICE මත්ද්‍රව්‍යයේ ස්වභාවය අනුව බොහෝ කාලයක් තබා ගැනීමේ යම් අපහසුතාවක් තිබෙනවා.ඒ වගේම කේරල ගංජා මුහුදේ පාවෙන්න දානවා වගේ ICE පාර්සල් පාවෙන්න දාන එකත් අපහසු බවයි තොරතුරු වාර්තා වන්නේ.
ඒ සියල්ල අස්සේ රට තුල ICE මෙතරම් බහුල වන්නට නම්, නිෂ්පාදන ක්‍රියාවලියක් රට ඇතුලේ සිදුවිය යුතු බවයි,ලියුම්කරු සතු තොරතුරු තහවුරු කරන්නේ.
ඒ වගේම තමයි, ICE කියන්නේ ඉතා සුළු ප්‍රමාණ (මිලිග්‍රෑම්) වලින් හුවමාරු වන මත්ද්‍රව්‍යක්.ඒ නිසා මේ ජාවාරම් දාමයේ මුල් පුරුකේ ඉඳන් භාවිතයට ගන්නා අය දක්වා ඉන්න පස් හය දෙනෙක් වගේ වන මුදලාලිලා යහමින් මුදල් හම්බ කරගන්නවා.
ICE සාමාන්‍යයෙන් තොග Pack එකක බොහෝවිට 100g වගේ තමයි හුවමාරු වන්නේ.
නමුත් ජාවාරමේ මුල් පුරුක බොහෝ විට 1kg වගේ අඩංගු Pack වශයෙන් රටතුල එහෙට මෙහෙට කරනවා.ඒ හිතන්නවත් බැරි ක්‍රම වලින්.සුඛෝපභෝගී වාහන වලින්.කාන්තාවන් හරහා වගේම යන්ත්‍ර සූත්‍ර (Generators වගේ ) ඇතුලේ.

මේ වසංගතය නවත්වන්න සැබෑ උවමනාවක් රටේ තීන්දු තීරණ ගන්න උදවියට තියෙනවා නම්, පාසල් දරුවන් Check කරලා වැඩක් නෑ.
ICE ජාවාරමේ යෙදෙන බවට හරියටම තොරතුරු තියන,විමර්ශන මගින් අනාවරණය කරගත්, බඩුත් එක්ක කොටු කරගත්, හතර පස් දෙනෙකුට,
නීතිපතිවරයා වෙතින් මහාධිකරණයක අධිචෝදනා කඩිනමින් ගොනු කරලා.දවස ගානේ නඩුව විභාග කරලා වරදකරු බවට තීන්දු වූ පසුව,
“එල්ලුම් ගහට” නග්ගවා….
අලුගෝසුවාට ලීවරය ක්‍රියාත්මක කිරීම උදෙසා අනුමැතිය ලබා දීම.
ඒ හැරුණු කොට පවත්නා ක්‍රමවේදය ප්‍රකාර පොලිසිය මහේස්ත්‍රාත් උසාවියක ICE විකුණන්න මුදලාලිලාට නඩු දාලා, මහාධිකරණයට දාන ඇප අයැදුමට අනුව ඇප පිට නිදහස් කරලා,
පහළ උසාවියේ නඩු ගොනුව නීතිපති උපදෙස් වලට යවලා.ඒ උපදෙස් එනකන් මුදලාලි නඩුවට නැගලා,බැහැලා යනතාක්,
මේ වසංගතයෙන් රට මිදෙන්නේ නෑ.
අවුරුදු හතර පහකින් මහාධිකරණය නඩුව අහන කොට ICE වලින් හම්බ කරපු සල්ලි වීසි කරලා රටේ නම් දරාපු නීතීඥ සහය අරන් මුදලාලිලා නිදොස් වන රටක බාලපරම්පරාව විනාශ වීම නවත්වන්න බෑ.
පොලිසියත්, අර කසිප්පු මුදලාලිලාත්,කුඩු මුදලාලිලාත්, ගංජා මුදලාලිලාත්, එක්ක දැනට කරගෙන යන Deal එක ICE මුදලාලිලා එක්කත් ඇතිකර ගනීවි.(දැනටමත් එහෙමයි)
මාසෙට සැරයක් පොලිසිය රු 5000/- එකතු කරන්න යන මුදලාලි වන්දනාවට ICE මුදලාලිලාත් එකතු වේවි.
ICE මුදලාලිගෙන්ම Information අරන් බඩු ගෙනියන්න එන එකා මග රැක ඉඳන් අල්ලාගෙන නඩු දමාවි.
මාධ්‍ය ආයතන මේ කරන වැඩෙන් වෙන්නේ තවත් විනාශයක් මිසක් යහපතක් නොවේ.
මන්ද යත්;
මේ මාධ්‍ය සංදර්ශන හරහා ICE නොගහන එකා තුල උනත්, අත්හදා බලන්න උත්තේජනයක් ගෙන එනවා.
ICE කියන්නේ කිසිඳු විටක අත්හදා නොබැලිය යුතු Drug එකක්. ඒ තරමට ඇබ්බැහි විය හැකි මාරාන්තික මත්ද්‍රව්‍යයක්.
අනෙක් මත්ද්‍රව්‍ය වගේ පළමු භාවිතයේදී ඇති කරන එපාවීම,ICE තුල නොමැතිවීම තමයි එයට හේතුව.
පළමු භාවිතයේ ඉඳන්ම මධ්‍ය ස්නායු පද්ධතිය උත්තේජනය කර ලබාදෙන ආන්නදනීය බව,
එක වරක් ICE ටිකක් විදුලි බුබුළු වීදුරු කටුවක් මත රත් කර නැගෙන සිහින් ධූමය බටයක ආධාරයෙන් මුව තුලට පුරවාගත් අයකුට, නැවත ඒ ක්‍රියාවේ නිරත වීමට උත්තේජනයක්.
එබැවින්, පාර්ලිමේන්තුව නව අන්තරායකර ඖෂධ පනත සම්මත කල පමණින්, එයින් ව්‍යවස්ථාදායකය බලාපොරොත්තු වන බවට පනතේ පූර්විකාවේ සඳහන් කිසිවක් ඉටු වන්නේ නැත.
ඒ සඳහා පවත්නා සමස්ත Legal System එකම සංශෝධනය කල යුතුය.
නීතිය ක්‍රියාත්මක වීමත්, නඩු විසඳවාලීමත්,යුක්තිය ඉටුවීමත් කඩිනම් නොකරන තාක්,
ICE විතරක් නොවේ රටේ තියන අන්‍යාකරයේ පර වැඩ, ජඩ වැඩ කිසිවකටත්, කවරාකාරයේ හෝ නැවතීමේ තිතක් තැබිය නොහැකි වේවි.
එබැවින්,සැබෑ අරගලය දිශාගත විය යුත්තේ Legal System Change එකකටය.
මේ වෑයම ඒ ඉදෙසාය.

ඉහත කී අන්තරායකර ඖෂධ පනතේ සංශෝධනය පිළිබඳ ලිපිය
👇👇
https://m.facebook.com/story.php?story_fbid=557574776377981&id=100063763890100&mibextid=Nif5oz

සටහන – ප්‍රබුද්ධ

Click here to see full post on FB

#MirigamaApi #මීරිගමඅපි #Mirigama #මීරිගම