රජයේ සේවකයා 5 රජයේ සේවකයන් වි…

, , Leave a comment

රජයේ සේවකයා 5

රජයේ සේවකයන් විෂයෙහි ඇතිවිය හැකි ගැටළු සහ ඊට අදාල නෛතික තත්වය

* බඳවා ගැනීම් පරිපාටියේ/සේවා ව්‍යවස්ථාවේ හෝ පත්වීම් ලිපියේ සඳහන් ආකාරයට නියමිත පරිදි කාර්යක්ෂමතා කඩඉම සමත් වීමට නොහැකි වූ නිලධරයන්ට සහන ලබා ගැනීම සඳහා පවතින විධිවිධාන කවරේද?

ඒ සඳහා රාජ්‍ය සේවා කොමිෂන් සභා චක්‍රලේඛ අංක 02/2011 සහ 02/2011 (1) හි විධිවිධාන පරිදි සහන කාලයක් ලබා ගැනීම සඳහා රාජ්‍ය සේවා කොමිෂන් සභාව වෙත ඉල්ලීමක් ඉදිරිපත් කළ හැකිය.

* රාජ්‍ය සේවයේ / පළාත් රාජ්‍ය සේවයේ ස්ථීර තනතුරක් දරමින් සිටින නිලධරයෙකු වෙනත් රජයේ තනතුරකට පත්වීමක් ලබා ගන්නා විට ඔහුගේ පෙර සේවා කාලය නව තනතුරේ සේවා කාලයට එකතු කළ හැකිද?

එකතු කළ නොහැක. එසේ වුවද, රාජ්‍ය සේවයේ/පළාත් රාජ්‍ය සේවයේ නියුතු නිලධරයෙකු විධිමත් පරිදි මුදා හැර ගෙන රාජ්‍ය සේවයේම නව පත්වීමක් ලබා ගන්නා අවස්ථාවේ දී, රාජ්‍ය සේවය/පළාත් රාජ්‍ය සේවය යටතේ වන පුර්ණ සේවා කාලය විශ්‍රාම වැටුප් ගණනය කිරීම සඳහා පමණක් අදාළ කර ගත හැක.

* රාජ්‍ය සේවයේ/ පළාත් රාජ්‍ය සේවයේ ස්ථීර තනතුරක් දරමින් සිටින නිලධරයෙකු වෙනත් රාජ්‍ය සේවයේ/ පළාත් රාජ්‍ය සේවයේ තනතුරකට පත්වීමක් ලබා ගන්නා විට ඔහුගේ වැටුප සකස් කිරීමේ දී පූර්ව සේවයේ ලබාගත් වැටුප සහ සේවා කාලය නව තනතුරේ වැටුප සකස් කිරීමේ දී අදාළ කර ගත හැකිද?

රාජ්‍ය සේවයේ/පළාත් රාජ්‍ය සේවයේ නියුතු නිලධරයෙකු විධිමත් පරිදි මුදා හැර ගෙන රාජ්‍ය සේවයේ/පළාත් රාජ්‍ය සේවයේ නව පත්වීමක් ලබා ගන්නා අවස්ථාවේ දී, රාජ්‍ය සේවය/පළාත් රාජ්‍ය සේවය යටතේ ලැබූ වැටුප සහ සේවා කාලය ආයතන සංග්‍රහයේ VII වන පරිච්ඡේදයේ 9 වගන්තියේ විධිවිධාන පරිදි වැටුප් වර්ධක වාසි ලබාදීම සඳහා සලකා බැලිය හැකිය

* මධ්‍යම රජයේ නිලධරයන්ගේ උසස්වීම් හා පත්වීම් පෙරදාතම් කිරීම සම්බන්ධයෙන් පැන නඟින ගැටලු සම්බන්ධයෙන් ක්‍රියා කළ යුත්තේ කෙසේද?

2009.02.20 දිනැති අංක 1589/30 දරන ගැසට් පත්‍රයේ ප්‍රකාශිත රාජ්‍ය සේවා කොමිෂන් සභා කාර්ය පටිපාටික රීති කෙරෙහි අවධානය යොමු කරමින් අදාළ උපදෙස් රාජ්‍ය සේවා කොමිෂන් සභාව වෙතින් ලබා ගත යුතුය

ඌණ සේවා උපාධිධාරීන්ගේ ගැටළු

* 2005.07.15 දිනැති රාජ්‍ය පරිපාලන චක්‍රලේඛ 20/94 (II) හි විධිවිධාන, 1980.12.31 දිනට පසුව රාජ්‍ය සේවයට බඳවා ගෙන ඇති නිලධරයන්ට අදාළ කර ගත හැකිද?

නොහැක

* රාජ්‍ය සේවයේ සියලුම උපාධිධාරීන් එකම වැටුප් තලයක පිහිටුවිය හැකිද?

එකම වැටුප් තලයක පිහිටුවිය නොහැක. වැටුප තීරණය කිරීම තනතුරට මිස එම තනතුරුවල සිටින පුද්ගලයන්ගේ සුදුසුකම්වලට අනුව සිදු නොකෙරේ

මුදා හැරීම්

* රාජ්‍ය සේවයේ එක් තනතුරක සිට රාජ්‍ය සේවයේ වෙනත් තනතුරකට හෝ අභ්‍යාසලාභී පුහුණුවකට ස්ථීරව මුදා හැර ඇති මධ්‍යම රජයේ නිලධරයෙකුට පෙරළා පූර්ව තනතුරට පැමිණීම සම්බන්ධයෙන් වර්තමානයේ බලාත්මක වන විධිවිධාන කවරේද?

2009.02.20 දිනැති අංක 1589/30 දරන ගැසට් පත්‍රයේ ප්‍රකාශිත රාජ්‍ය සේවා කොමිෂන් සභා කාර්ය පටිපාටික රීති සංග්‍රහයේ මීට අදාළ විධිවිධාන සඳහන් නොවන හෙයින් මේ පිළිබඳව රාජ්‍ය සේවා කොමිෂන් සභාව වෙතින් උපදෙස් ලබා ගත යුතුය

දේශපාලන අයිතිවාසිකම්

* මැතිවරණයකට තරඟ කරන දේශපාලන අයිතිවාසිකම් හිමි නිලධරයෙකු, ඒ සඳහා නිවාඩු ඉල්ලුම් කිරීමේ දී, එම වසරේ ඔහුට හිමි එතෙක් ලබා නොගත් සාමාන්‍ය නිවාඩු තිබේ නම් ඒවා ලබා ගැනීමට හැකියාවක් තිබේද?

ඔව්. එම වසරට අදාළ අනියම් නිවාඩු ද, පෙර වර්ෂයේ විවේක නිවාඩු ඉතිරිව ඇත්නම් එම නිවාඩු සහ පවත්නා වර්ෂයට අදාළව උපයා ගෙන ඇති විවේක නිවාඩු ද ලබා ගත හැකිය

* දේශපාලන අයිතිවාසිකම් හිමි නිලධරයෙකු පළාත් පාලන මැතිවරණයකට ඉදිරිපත් වී ජය ගෙන සභික තනතුරකට පත් වූ විට ඔහු දරමින් සිටි තනතුරෙන් ඉල්ලා අස් විය යුතුද?

නැත. රජයේ ඔහු දරමින් සිටි තනතුරේ සිටිය දීම මසකට දින 05ක උපරිමයකට යටත්ව අදාළ රැස්වීම්වලට සහභාගී විය හැකිය. (2007.05.22 දිනැති රාජ්‍ය පරිපාලන චක්‍රලේඛ 13/2007)

* දේශපාලන අයිතිවාසිකම් හිමි නිලධරයෙකු පළාත් පාලන මැතිවරණයකට ඉදිරිපත් වී ජයගෙන සභාපති තනතුරකට පත් වූ විට ඔහු දරමින් සිටි තනතුරින් ඉල්ලා අස්විය යුතුද?

නැත. සිය තනතුරේ සිටිය දීම මසකට දින 05ක උපරිමයකට යටත්ව අදාළ රැස්වීම්වලට සහභාගී වීම සඳහා සේවයේ හදිසි අවශ්‍යතාවන්ට යටත්ව වැටුප් සහිත නිවාඩු ලබා දිය හැකිය

* දේශපාලන අයිතිවාසිකම් හිමි නිලධරයෙකු පළාත් සභා මැතිවරණයකට ඉදිරිපත් වී ජයගෙන නගරාධිපති/සභාපති තනතුරකට පත් වූ විට ඔහු දරමින් සිටි තනතුරින් ඉල්ලා අස්විය යුතුද?

නැත. පහත සඳහන් මනාප 02න් ඕනෑම එක් මනාපයක් භුක්ති විඳිය හැකිය.

පළාත් පාලන ආයතනයේ එම තනතුර දරන සම්පූර්ණ කාලයම වැටුප් රහිත නිවාඩු ලබා ගැනීම.
නිත්‍ය තනතුරේ සිටිය දීම ‍සේවයේ හදිසි අවශ්‍යතාවන්ට යටත්ව මසකට උපරිම දින 07ක් දක්වා වැටුප් සහිත නිවාඩු ලබා ගනිමින් රැස්වීම්වලට සහභාගී වීම.

* දේශපාලන අයිතිවාසිකම් හිමි නිලධරයෙකු පළාත් සභා මැතිවරණයකට ඉදිරිපත් වී ජයගෙන සභිකයෙකු වශයෙන් පත් වූ විට ඔහු දරමින් සිටි තනතුරෙන් ඉල්ලා අස්විය යුතුද?.

නැත. පහත සඳහන් මනාප 02න් ඕනෑම එක් මනාපයක් භුක්ති විඳිය හැකිය

පළාත් සභාවේ සභිකයෙකුව සිටින තාක් වැටුප් රහිත නිවාඩු මත පූර්ණකාලීන පදනමක් මත මුදා හැර ගැනීම.
ආයතන සංග්‍රහයේ XXXII පරිච්ඡේදයේ 2:3:4 උප වගන්තියේ විධිවිධානවලට යටත්ව විශ්‍රාම ගැනීම

*දේශපාලන අයිතිවාසිකම් හිමි නිලධරයෙකු පාර්ලිමේන්තු මැතිවරණයකට ඉදිරිපත් වී ජයගෙන මන්ත්‍රීවරයෙකු වශයෙන් පත් වූ විට ඔහු දරමින් සිටි තනතුරෙන් ඉල්ලා අස් විය යුතුද?

ඔව්

* දේශපාලන අයිතිවාසිකම් අහිමි නිලධරයෙකු මැතිවරණයකට තරඟ කිරීම සඳහා සේවයෙන් ඉල්ලා අස් විය යුතුද?

ඔව්. එසේ වුවද වසර 10ක් හෝ ඊට වඩා වැඩි විශ්‍රාම වැටුප් සහිත සේවා කාලයක් ඇත්නම් ආයතන සංග්‍රහයේ XXXII පරිච්ඡේදයේ 1:3 උප වගන්තියේ විධිවිධාන අනුව ක්‍රියා කළ හැකිය.

* මැතිවරණයකට තරඟ කිරීම සඳහා රාජ්‍ය සේවයේ තමා දරන තනතුරෙන් ඉල්ලා අස් වූ දේශපාලන අයිතිවාසිකම් අහිමි නිලධරයෙකුට නැවත පූර්ව තනතුරට පැමිණිය හැකිද?

නොහැක.

භාෂා දිරි දීමනා සහ රාජ්‍ය භාෂා ප්‍රතිපත්තිය

* අ.පො.ස. (සා.පෙළ) විභාගයේ දී වෛකල්පික/ද්විතීය භාෂාව ලෙස සිංහල/දෙමළ භාෂාව සමත්වීම රාජ්‍ය පරිපාලන චක්‍රලේඛ 29/98 යටතේ හා රාජ්‍ය පරිපාලන චක්‍රලේඛ 03/2007 යටතේ දිරි දීමනා ගෙවීමට අදාළ කර ගත හැකිද?.

නොහැක

* සිංහල මාධ්‍යයෙන් හදාරන ලද උපාධි පාඨමාලාවක අනු විෂයක් ලෙස ඉංග්‍රීසි භාෂාව සමත් වීම මත දිරි දීමනා ලබා දිය හැකිද?

නොහැක

* කිසියම් තනතුරකට අදාළ බඳවා ගැනීමේ පරිපාටියේ/සේවා ව්‍යවස්ථාවේ හෝ අයදුම්පත් කැඳවීමේ නිවේදනයේ බඳවා ගැනීමේ සුදුසුකමක් ලෙස කිසියම් භාෂා ප්‍රවීණතාවක් ඉල්ලා තිබේ නම් එම භාෂා ප්‍රවීණතාව සඳහා රාජ්‍ය පරිපාලන චක්‍රලේඛ 29/98 හෝ රාජ්‍ය පරිපාලන චක්‍රලේඛ 03/2007 අනුව දිරි දීමනා ලබා ගත හැකිද?

නොහැක

රාජ්‍ය පරිපාලන චක්‍රලේඛ 29/98 යටතේ දිරි දීමනා ලබා දීමට මානව සම්පත් අභිවර්ධන ආයතනයේ (සේවක අධ්‍යාපන ආයතනයේ) සහතික අදාළ කර ගත හැකිද?
එම ආයතනයේ ඉංග්‍රීසි භාෂා ඩිප්ලෝමාවක් හෝ ඉංග්‍රීසි මාධ්‍යයෙන් උපාධියක් හෝ හදාරා සහතික ලබා ඇත්නම් එම සහතික දිරි දීමනා ලබා දීම සඳහා අදාළ කර ගත හැකිය.

*සේවය ස්ථිර කළ රජයේ නිලධරයෙකුට රාජ්‍ය පරිපාලන චක්‍රලේඛ 29/98 යටතේ භාෂා දීමනාව ගෙවීම ආරම්භ කළ යුත්තේ පත්වීම ලද දින සිටද? සේවයේ ස්ථිර කළ දින සිටද? වාචික පරීක්ෂණයෙන් සමත් වූ/නිදහස් වූ දින සිට ද නැතිනම් දිරි දීමනා ඉල්ලන දින සිටද?

නිලධරයා පත්වීම ලැබූ දිනට ලිඛිත සුදුසුකම් සපුරා ඇත්නම් හා වාචික පරීක්ෂණයෙන් සමත් වී/නිදහස් වී ඇත්නම්, ඔහුගෙන් අදාළ භාෂා මාධ්‍යයෙන් ලබා ගෙන ඇති සේවය සලකා බලා, වාචික පරීක්ෂණයෙන් සමත් වූ/නිදහස් වූ දිනය නොසලකා, පත්වීම් ලද දින සිට දීමනාව ගෙවීමට තීරණයක් ගැනීමට දෙපාර්තමේන්තු ප්‍රධානියාට හැකියාව තිබේ

* නැවත සේවයේ යොදවන ලද නිලධරයන් හා කොන්ත්‍රාත් පදනම මත සේවයට බඳවා ගෙන ඇති නිලධරයන් රාජ්‍ය පරිපාලන චක්‍රලේඛ 29/98 හෝ රාජ්‍ය පරිපාලන චක්‍රලේඛ 03/2007 යටතේ දිරි දීමනා ලැබීමට හිමිකම් ලබන්නේද?

නැත.

* අ.පො.ස. (උ.පෙළ) විභාගයේ දී සාමාන්‍ය ඉංග්‍රීසි (General English) විෂයය සමත් වීම රාජ්‍ය පරිපාලන චක්‍රලේඛ 29/98 යටතේ දිරි දීමනා ගෙවීම සඳහා අදාළ කර ගත හැකිද?

නොහැක

* රාජ්‍ය භාෂා දෙපාර්තමේන්තුවේ මූලික දෙමළ පාඨමාලාව/උසස් දෙමළ පාඨමාලාව/මූලික සිංහල පාඨමාලාව/උසස් සිංහල පාඨමාලාව හදාරා සමත් වීම මත රාජ්‍ය පරිපාලන චක්‍රලේඛ 03/2007 යටතේ දිරි දීමනා ලබා ගත හැකිද?

නොහැක.

* රාජ්‍ය පරිපාලන චක්‍රලේඛ 29/98 යටතේ සිංහල/දෙමළ රාජ්‍ය භාෂා සඳහා දිරි දීමනා ලබා ගත් නිලධරයෙකුට, රාජ්‍ය පරිපාලන චක්‍රලේඛ 03/2007 හි විධිවිධාන ක්‍රියාත්මක වීමෙන් පසුව ඔහු ලබන භාෂා දීමනාව තවදුරටත් ගෙවිය හැකිද?

හැකිය. රාජ්‍ය පරිපාලන චක්‍රලේඛ 03/2007හි අවශ්‍යතා සම්පූර්ණ කර එහි විධිවිධාන පරිදි රාජ්‍ය භාෂාවක් සඳහා දිරි දීමනා ලබා ගැනීමේ දී රාජ්‍ය පරිපාලන චක්‍රලේඛ 29/98 යටතේ ලබාගත් භාෂා දිරි දීමනාව නතර කළ යුතුය.

විනය කටයුතු

* මූලික විමර්ශන පැවැත්වීමට විශ්‍රාමික නිලධරයන් යෙදවිය හැකිද?

නොහැක. රජයේ සේවයේ නියුතු නිලධරයෙකුම යෙදවිය යුතුය. එසේ වුවත් අත්‍යවශ්‍ය අවස්ථාවක දී විශ්‍රාමික නිලධරයෙකු යොදවා ගැනීමට අදහස් කරන්නේ නම් ඒ සඳහා රාජ්‍ය සේවා කොමිෂන් සභාවේ පූර්ව අනුමතිය ලබා ගත යුතුය.

චෝදනා පත්‍රය, සාක්ෂිගත ලේඛන හා සාක්ෂිකරුවන්ගේ නාම ලේඛනය සංශෝධනය කළ හැකි අවස්ථා ගණන කීයද?
ආයතන සංග්‍රහයේ II වැනි කාණ්ඩයේ XLVIII පරිච්ඡේදයේ,

14:4 උප වගන්තිය අනුව චෝදනා පත්‍රය නිකුත් කර විධිමත් විනය පරීක්ෂණය ආරම්භ කරන අවස්ථාව දක්වා කාල සීමාව තුළ ඕනෑම වාර ගණනක් චෝදනා පත්‍රය සංශෝධනය කිරීමට විනය බලධරයාට බලය ඇත.

14:6 උප වගන්තිය අනුව, විධිමත් විනය පරීක්ෂණය ආරම්භ කිරීමෙන් පසු, නඟා ඇති චෝදනා සම්බන්ධයෙන් චෝදනා පත්‍රය දෙවරක් සංශෝධනය කළ හැකිය.
14:8 උප වගන්තිය අනුව, විධිමත් විනය පරීක්ෂණය ආරම්භ කිරීමෙන් පසු සාක්ෂිගත ලේඛන හා සාක්ෂිකරුවන්ගේ නාම ලේඛනය දෙවරක් සංශෝධනය කළ හැකිය.

විධිමත් විනය පරීක්ෂණයක දී පැමිණිල්ල මෙහෙයවන නිලධරයාට සාක්ෂිගත ලේඛන හා සාක්ෂිකරුවන්ගේ නාම ලේඛනය සංශෝධනය කිරීමේ දී අලුතින් සාක්ෂිගත ලේඛන හා සාක්ෂිකරුවන්ගේ නම් චෝදනා පත්‍රයට ඇතුළත් කළ හැකිද?
හැකිය. ආයතන සංග්‍රහයේ II වැනි කාණ්ඩයේ XLVIII පරිච්ඡේදයේ 14:8 උප වගන්තියෙන් විධිවිධාන සලසා තිබේ

* මූලික විමර්ශනයේ දී සාක්ෂිකරු විසින් කරනු ලැබ ඇති ලිඛිත ප්‍රකාශයක් විධිමත් විනය පරීක්ෂණයක දී සාක්ෂියක් ලෙස පිළිගත යුතුද?

ආයතන සංග්‍රහයේ II වැනි කාණ්ඩයේ XLVIII පරිච්ඡේදයේ 21:13 වගන්තියේ විධිවිධාන අනුව මූලික විමර්ශනයේ දී දෙන ලද ලිඛිත ප්‍රකාශයක් සත්‍ය බව සාක්ෂිකරු විසින් විධිමත් විනය පරීක්ෂණයේ දී පිළිගනු ලබන්නේ නම් එය විධිමත් විනය පරීක්ෂණයේ දී සාක්ෂියක් ලෙස පිළිගත යුතුය.

* චූදිත නිලධරයෙකුගේ දුරකථන හෝ වෙනත් සංවාදයක පටිගත කළ හඬ පටයක්, විධිමත් විනය පරීක්ෂණයක දී පැමිණිල්ලේ සාක්ෂියක් ලෙස පිළිගත හැකිද?

ඉදිරිපත් කිරීම‍ට නෛතික බාධාවක් නැත. දුරකථන හෝ වෙනත් සංවාදය පටිගත කරන ලද පුද්ගලයා හෝ එකී දුරකථන සංවාදයට හවුල් වු අනෙක් තැනැත්තා අදාළ පරීක්ෂණයේ සාක්ෂිකරුවෙක් ලෙස කැඳවීමෙන් චූදිත විසින් කළා ‍යැයි කියන ප්‍රකාශය ස්වාධීනව ද තහවුරු කර ගත හැක.

* විධිමත් විනය පරීක්ෂණයක් පැවැත්වෙන අතරතුර චූදිත නිලධරයා මියගිය අවස්ථාවක විනය පරීක්ෂණය අත්හිටුවා තීරණයක් ලබාදිය හැකිද?

විනය පරීක්ෂණය අත්හිටු විය හැකිය. එහෙත් මෙවැනි අවස්ථාවක දී වරදකාරිත්වය පිළිබඳව නිගමනයකට එළඹීමේ හැකියාවක් නොමැත.

*නිලධරයා සේවයේ යෙදී සිටිය දී කරන ලද විෂමාචාරයක් සම්බන්ධයෙන් ඔහු විශ්‍රාම ගැන්වීමෙන් පසු අනාවරණය වන අවස්ථාවක අදාළ විෂමාචාරය සම්බන්ධයෙන් ගත යුතු ක්‍රියා මාර්ගය කුමක්ද?

අදාළ නිලධරයා විශ්‍රාම වැටුප් ව්‍යවස්ථා සංග්‍රහයේ 12 වන වගන්තියට යටත් කොට විශ්‍රාම ගන්වා නොමැති නම් ඔහුට විරුද්ධව විනයානුකූලව කටයුතු කළ නොහැකි අතර පවත්නා සාමාන්‍ය නීතිය යටතේ කටයුතු කළ යුතුය.

* නිලධරයා සේවයේ යෙදී සිටිය දී කරන ලද විෂමාචාරයක් සම්බන්ධයෙන් ඔහු විශ්‍රාම ගැන්වීමෙන් පසු අනාවරණය වන අවස්ථාවක රජයට සිදු වී ඇති අලාභ හානියක් වෙතොත් එය අය කර ගැනීම සඳහා ගත යුතු ක්‍රියා මාර්ගය කුමක්ද?

සාමාන්‍ය නීතිය යටතේ කටයුතු කර විශ්‍රාමික නිලධරයා වරදකරු වුවෙහාත් ඔහුගෙන් රජයට සිදුව ඇති අලාභය, විශ්‍රාම වැටුප් ව්‍යවස්ථා සංග්‍රහයේ 43 (අ) වගන්තියේ විධිවිධාන අනුව අදාළ නිලධරයාගේ විශ්‍රාම වැටුපෙන් අය කර ගැනීමට හැකියාව ඇත.

“ප්‍රබුද්ධ”

Click here to see full post on FB

#MirigamaApi #මීරිගමඅපි #Mirigama #මීරිගම