පුරාණයේ දීත් මිනිසුන් පැය දෙකෙන් දෙකට මොනවා හරි කටේ ඔබා ගත්තාද ?
……………………………………………………………………………
පුරාණයේ මිනිසුන් ආහාර ගත්තේ අපි අද ආහාර ගන්නා ආකාරයට වඩා සමිපූර්ණයෙන්ම වෙනස් ආකාරයකටය.
අපි කැලේ…දඩයමින් ජීවත් වන විට ගල්ගුහාවේ ශීතකරනයක්වත්, හැම හන්දියකම කොත්තු කඩයකුත් තිබුනේ නැත…
උදේ දඩයමේ යන්නට පෙර…ක්‍රීම් ක්‍රැකර් දෙකක් කාලා කිරි තේකක් බොන්න විදිහක් තිබුනේ නැත.
දඩයමක් කරගත්තොත් කන්න තිබුනා ..නැතිනම් නිකම්….
වැද්දන් අදත් ආහාර ගන්නේ දවසට දෙවේලකි…උදෑසන දහයට පමන සහ සවස බිං කලුවර වැටෙන්නට පෙර…
මිනිසා අවුරුදු ලක්ස විසිපහක් පමන ආහාර ගත්තේ මේ ආකාරයටයි….
මිනිසා වගා කටයුතු ආරම්බ කලේ වසර 10000-20000 පමන පෙරය…ඉන් පසුත් වසර තුන්සීයකට මෙහා වන තුරුත් මල පෙරේතයෙකු මෙන් උදේ නැගිට්ට වෙලේ පටන් නැවත රෑ දෙගොඩ හරියක් වනතුරු පැය දෙකෙන් දෙකට මොනවා හරි කටේ ඔබා ගත්තේ නැත.
බටහිර ජාතීන් ගේ ආදිතමයා වන රෝම ජාතිකයින් ආහාර ගත්තේ දවසටම එක ආහාර වේලකි. එයද සවස් වරුවේය. උදේ ආහාරය ගැනීම පෙරේත කමක් ලෙස සලකා බැහැර කරන ලදී. රජෙක් වගේ උදෑසන ආහාරය ගන්නට කිවුවේ එංගලන්තයේ සුද්දා කාර්මීකරණයත් සමග මිනිසුන් වැඩිවේලාවක් කර්මාන්ත ශාලා ඇතුලේ තබා ගන්නට අවශ්‍යය නිසා මිසක අපේ සෞඛ්‍යය හොඳ කරන්නට තිබුණු අමාරුවකට නොවේ. 1950 ගනන් වලින් පසු බටහිර රටවල ආණ්ඩු උදේ ආහාරය ප්‍රචලිත කරන්නට වෙහෙසුනහ.
දිවා ආහාරය සඳහා වන ඉංගිරීසි වචනය වන lunch කොහෙන් ආවාද කියාවත් නිශ්චිත නිගමනයක් නැත.
රෝම ජාතිකයන් දවසටම ආහාර ගත්තේ එක වේලකි (Dinner). එනම් රාත්‍රී ආහාරයයි. එයත් සවස දෙකත් හතරත් අතර වීය. දහ අටවන ශත වර්ශයෙන් පසුව එය කෙමෙන් කෙමෙන් රාත්‍රී ආහාරය විය. අතීතයේදී බොහෝ බටහිර ජාතීන් අතර රාත්‍රී ආහාරය දවසේ විශාලම ආහාර වේල විය. උදෑසන සහ දිවා ආහාර කුඩා ආහාර වේලවල් විය. විදුලි ආලෝකය සමග කෙමෙන් රාත්‍රී ආහාරය දවසේ කලුවර භාගය දක්වා පසු බැස්සේය.
1977 දී ඇමෙරිකානුවන් ආහාර පිරමිඩය හඳුන්වාදීමත් සමග මෙතෙක් මිනිසා ආහාර ගත් ආකාරය උඩු යටිකුරු කර දැමීය. නිරෝගීව ජීවත් වන්නටත් හෘද රෝග වලින් වැලකෙන්නටත් දිනකට ප්‍රධාන ආහාර වේල තුනකුත් අතර මැදට කෙටි ආහාර වේල් දෙකක් හෝ තුනක් ගිල දමන ලෙස මහජනතාවට දැනුවත් කෙරිනි. එතෙක් මෙතෙක් අතීතයේ කිසිම කලක මිනිසා මෙතරම් ආහාර තොගයක් සැරින් සැරේ දවස පුරා ගිල දැම්මේ නැත. එතැන් පටන් මානව වර්ගයා එන්න එන්නම මහත් වන්නටත් රෝගී වන්නටත් පටන් ගත්තේ්ය. අද වන විට ඇමරිකාවේ ජනගහනයෙන් 70% ක් අසාමාන්‍ය ලෙස මහතය. 50% ක් දියවැඩියාවෙන් හෝ පූර්ව දිය වැඩියාවෙන් පෙලෙති. සුද්දාගේ ආහාර රටාව අනුගමනය කරන අපේ රටේ දත්ත ඊටත් වඩා හොඳ මට්ටමක පවතී. එනම් කොළඹ තදාසන්න ප්‍රදේශ වල දියවැඩියාව සහ පූර්ව දියවැඩියාවෙන් පෙලෙන්නන් ගේ ප්‍රතිශතය 57% වෙයි.
ආසියාතිකයින්ගේ පුරාණ ආහාර පුරුදු පිලිබඳව හැදෑරීමේදී අපේ ආගමික චාරිත්‍ර වාරිත්‍ර වලින් යම් ආලෝකයක් ලබා ගන්නට පුලුවන්.
බෞද්ධයන් ගේ උත්තරීතර ගුරුතුමා වන බුදුරජානන් වහන්සේ සිය අනුගාමිකයන්ට අනු දැන වදාලේ පිඬුසිඟා ගන්නා දානය ඉර අවරට හැරෙන්නට මත්තෙන් වලඳන ලෙසටය. එපමණකි. වර්තමානයේ ආහාර වෙනුවට බෙහෙත් පෙති ආහාරයට ගන්නා පෘතගජනයින්ට උන්වහන්සේගේ ඔවදන් පිලිපදින්නට තරම නුවණක් පහල වුවහොත්; හන්දියක් හන්දියක් ගානේ ඇති සිල්ලර වෛද්‍ය මධ්‍යස්ථාන සහ රට පුරා ඉදිවන රෝහල්වල මැස්සන් ඇහිරෙනු ඇති. ඖෂධ සමාගම් වල, බහු ජාතික ආහාර සමාගම් සහ දොස්තර මහත්වරුන්ගේ පිනට අපේ මිනිස්සුනට එහෙම නුවණක් පහල වන පාටක් අහල ගං හතකටවත් පෙනෙන්නට නැත.
හින්දු ආගමිකයන් විවිධාකාර හේතූන් මත උපවාස කරති. සමහර විටෙක බුදු රජානන් වහන්සේද හින්දු ආගමේ ආභාසයන් ලබන්නට ඇති. ශිව භක්තිකයන් සඳුඳා උපවාස කරන අතර විශ්ණු භක්තිකයන් බ්‍රහස්පතින්දා උපවාස කරති.තවද පොහොය දිනෙන් පසු එකොලොස්වන දින සහ නව සඳට පසු එකොලොස්වන දින ඔවුහු උපවාස කරති. හින්දු කාන්තාවන් සෑම සඳුඳාම හොඳ ස්වාමිපුරුෂයෙක් සඳහා උපවාස කරති.
මුසල්මානුවන්ගේ ආගමික වතාවතක් වන රාමසාන් මාසයද මීට සමාන බවක් දනවයි. අවුරුද්දකට මාසයක කාලයක් තුල මුස්ලිම් අනුගාමිකයන් උදෑසන සිට රාත්‍රිය දක්වා කෙල ගිලීමෙන් පවා වැලකී සිටිති. නූතන වචන වලින් නම් මෙය වියලි උපවාසයකි.(Dry Fast).
අපේ පෝෂණවේදී වෛද්‍යවරුන් දේශනා කරන අන්දමට උපවාස කිරීම හෝ කෑම වේල් මඟහැරීම ආනන්තරීය පාප කර්මයකි. ඔවුනට අනුව ආහාර වේල් මඟ හැරීම නිසා ආහාර අනුභවයේ් විකෘතිතා(Eating Disorders) ඇතිවන්නට ඉඩ තිබේ. විශේෂයෙන්ම උදෑසන ආහාර වේල රජෙක් වගේ කන්න කියා උපදෙස් ලැබේ.
නමුත් හාස්‍යජනක කාරනය නම් නොයෙකුත් ආකාරයේ උපවාසයන් කරන පෙරදිග ජාතීන් අතර ආහාර අනුභවයේ විකෘතිතාවන් දකින්නට නැති අතර; දවසට වේල් පහක් හයක් අනුභව කරන ඇමෙරිකානුවන් සහ බටහිරයන් අතර මෙම විකෘති ආහාර ගැනීමේ රටාවන් සුලභ වීමයි. එසේම ස්ථුලතාව සහ ඒ ආශ්‍රිත රෝගාබාධ වසංගත තත්වයෙන් ආරම්භ වූයේ බටහිරයන් අතරය. බටහිරයන්ගේ ආහාර රටාවට නැඹුරුතාව වැඩිවන්නට වැඩිවන්නට මේ රෝගාබාධ ඉහල යයි.
ස්ථුලතාව සහ දියවැඩියාවට නොයෙක් හේතු තිබෙන්නට පුලුවන් වුවත් පෙර අපර දෙදිගම මෑත ඉතිහාසයේ වසර සියයක් දෙසියයක් තුල ඇතිවී තිබෙන ආහාර රටාවේ විකෘතිතා ඊට බෙහෙවින් බලපාන්නට ඇත. අපේ සායනික අත් දැකීම නම් නූතන ආහාර රටාවන් අතහැර මෙම පුරාණ ආහාර ගැනීමේ රටා වන්ට අනුගත වූ විගස ස්ථුලතාව සහ දියවැඩියාව හිරු දුටු පිණි මෙන් අතුරුදහන් වන බවය.
පමාවී හෝ ඔවුන් අන්තර්වාර උපවාසය (Intermittant Fasting) හඳුන්වා දෙමින් වැරැද්ද හදාගන්නට බටහිරයන් උත්සාහ ගනිමින් සිටිති. අන්තර්වාර උපවාසය වසර දහස් ගනනකට පෙර හින්දු ආගමිකයනුත්, බෞද්ධයනුත්, මුසල්මානුවනුත් පුරුදු පුහුණු චාරිත්‍රයකි. එසේ වුවත් අපි අපේ වටිනාකම් වලට හිනා වෙමින් බටහිරයන් අහක දැමූ පරණ හණමිටි කරතබාගෙන යමු.
කිසිදු විටක පොඩි බඩගින්නකට ආහාර ගන්න එපා. පොඩි බඩගින්නකට ඇල් වතුර වීදුරුවක් බොන්න පුරුදු වන්න. බඩගින්න ලොකු වෙනකම් කුමන හෝ “ප්‍රයෝජනවත්” කාරියක නිරත වන්න. චුට්ටක් කන්න එපා. ඇති පමණ කන්න. අඩු කරනවානම් අඩු කල යුත්තේ පිෂ්ඨය සහිත ආහාරයි. තන්තුමය ආහාර, මේදය සහ ප්‍රෝටීන අඩංගු ආහාර ඇති පමණ කන්න.
Dr.Wannaku
(උපුටා ගැනීමකි!) සී හෙළ
Click here to see full post on FB
#MirigamaApi #මීරිගමඅපි #Mirigama #මීරිගම