වෙනස්ම සිතිවිල්ලක්….
පුණ්‍යකර්මයකට හැරවූ…
මීරිගම කොල්ලො කෙල්ලො සෙට් එකක්….
වෙසක් පෝය දවසේ “කුරුඳු පැල දන්සලක්” කිව්ව පමණින්ම, ඇසූ පමණින්ම ගොඩක් දෙනෙක්ට නුහුරක් දැනෙනවා ඇති. ඔවු මම දන්න තරමින් මේ වැනි දන්සලක් මීරිගමටත් අලුත් දෙයක්. මගේ කියවීමේ හැටියට නම් පොදු දන්සැල් රාමුවෙන් ඔබ්බට ගොස් සිදුකරන ලද පැහැදිලිවම වෙනස් වැඩක්. ඒ දේ මනාවට ඔප්පු වෙනවා දන්සල පවත්වමින් සිටින අතරතුර ලැබුණු ප්‍රතිචාරවලින්ම. පාරේ යන සමහරු ෆොටෝ පවා ගන්නවා දැකගන්නත් පුළුවන් වුණා.
අපේ හිතවතා, Udara Sampath සහෘදයා තමයි මේ වැඩේට මූලිකත්වය අරගෙන කටයුතු කළේ. ඇත්ත වශයෙන්ම ඔහු මේ වෙනුවෙන් යම් කිසි ලෙස කාලය සහ මුදල් කිරීමක් සිදුකලා. ඒ වගේමයි මේ වැඩේට ඕන කරන සම්පූර්ණම මුදල් සොයාගත්තේ ෆේස්බුක් එකේ ඉන්න ඔහුගේම මිතුරන් සම්බන්ධ කරගෙනයි. ඒ වගේම කියන්න ඕන ඔහුට ගැලපෙනම මිතුරු කැලක් ඔහු විසින් සිදුකරන මේ වැනි පොදු වැඩවලට දායකත්වය ලබාදෙන්න සූදානමින් ඉන්න එකත් ඔහුගේ මෙවැනි වැඩවලට ලොකු පිටිවහලක්. ඉදිරියටත් මෙවැනි වැඩකටයුතු සිදුකිරීමට ඔහු ඇතුළු ඔහුගේ මිතුරු මිතුරියන්ට ශක්තිය ධෛර්ය ලැබේවායි කියා අප සැම එක්ව ප්‍රර්ථනා කරමු.
ඇත්තෙන්ම මේ වගේ දන්සලක් පැවැත්වීමට ඔහු ගත් මේ උත්සාහයේ ප්‍රතිඵල පිළිබඳව අපිට අද, හෙට ඒ නැත්නම් තවත් මාසයකින් දෙකකින් බලාපොරොත්තු වෙන්නවත් කතාකරන්නවත් පුළුවන්කමක් නෑ. හැබැයි ඔහු ඒ සංවිධානය කරන ලද දන්සලෙන් රැගෙන ගිය එක පැලයක් හෝ නියමිත ආකාරයට සිටුවා රැක බලා ගතහොත් තවත් ඉදිරි වසර කීපයකින් ප්‍රතිඵල පිළිබඳව අපිට කතාකරන්න දේවල් ඕනෑවටත් වඩා තියෙයි.
කුරුඳු ගසක් කියන්නේ හරි නම් නිවසක තිබිය යුතු අනිවාර්ය ශාකයක් බවට පත්විය යුතුයි. ඒ මොකද කියන්න මම අමුතුවෙන් කියන්න ඕනත් නෑ ගොඩක් අය දන්නවා. කුරුඳු කියන්නේ ඖෂධීය වටිනාකමක් ඇති ශාකයක් මෙන්ම අපේ රටේ හැදෙන කුළු බඩු සඳහා භාවිතාකරන අග්‍රගන්‍ය ශාකයක්. ඒත් සමහර කෙනෙකුට ප්‍රශ්නයක් ඇති වෙන්න පුළුවන් එක කුරුඳු ගහක් හදාගෙන මොනවා කරන්නද කියලත්. ඒත් ගෙදරක කුරුඳු ගහක් තියෙන කෙනෙක් තමයි දන්නේ එහි වටිනාකම. අලුතින් කුරුඳු ගසක් ඔබේ ගෙවත්තෙත් සිටුවා ගතහොත් එහි වටිනාකම ඉදිරියේදී තේරුම්ගත හැකි වේවි.
මේ හැමදේම අවසානයේ කීමට ඇති දෙය නම්, තුරුලතා, වන සම්පත් රැකගන්න සහ ඒවාට ආදරය කරන්න. එවිට ඔබත් ස්වභාවදහම තුලින්ම සුරැකෙන බව ඒකාන්තයි.
Darshana Dissanayake සහෝදරයා විසින් තැබූ සටහනක් ඇසුරින්
Click here to see full post on FB
#MirigamaApi #මීරිගමඅපි #Mirigama #මීරිගම